خذ استراحة

كل فترة ، خذ إجازة ..
مش بالضرورة تركيا أو شرم الشيخ أو المالديف، حتى لو بالبحر الميت أو العقبة، المهم تعمل إنعاش لروحك وتغيير بالوجوه اللي بتمرّ قدام عيونك ..
خذ إجازة وخذ معك آلة حاسبة عشان تحسبها وتشوف كم حدا دخل حياتك في الفترة الماضية وكم حدا لازم يطلع منها ..

خذ القرار وطلّع الناس اللي بيوخذوا منك وما بيعطوا ، طلّع الناس المنافقين والسلبيين والسيئين ، قدّ ما تقدر ..
طلّع الناس اللي بتسببوا في وجعك بقصد أو من غير قصد ..

ما تتحمل فوق طاقتك مع أي حد لأنه ما حدا حيتحملك فوق طاقته ! إلا إذا كان فعلاً بيستاهل إنك تتحمله ، وهو فعلاً فعلاً ممكن يتحملك ، مش مجرد حكي ..

ولما تطلع حدا من حياتك ويعتقد إنك واطي وهو مش عارف إنه السبب منه ؛ إما فعلاً بتكون جريء وبتصارحه أو بتبتسم وبتمشي بطريقك من غير ما تبررله أو تفسرله أي إشي !
الحياة ما فيها كتير ..

لهيك خليك مع اللي بيحبك وبيحسّ بوجعك قبل ما تحكي ، ويسندك قبل ما تطلب.. وجدّ جدّ من قلبك خذ قرار واخبط الباب وراك وحِبّ حالك ..
حبّ حالك وصرّخ قدام المراي :
أنا أهمّ حدا ..

أنا همّ من كل الأنانيين واللئيمين ، وحياتي أحسن بمليون مرة بدونهم ، وأهلاً بكل اللي دخلوا ، ومع القلعة لكلّ اللي طلعوا ..
باي باي من غير أسف !
اعمل هيك ..
ضروري ، بأسرع وقت ..
قبل ما روحك تشيخ ..
وقلبك يجعّد !!