الزواج بالمنطق

الشباب اللي حابين وقادرين يدفعوا على أعراسهم مبالغ طائلة، بارك الله لكم ووفقكم، أما الشباب اللي نفسهم يتزوجوا وداخلين بالحيط من الواقع الحالي اللي للأسف صار شبه اجباري عند ٩٠% من أفراد المجتمع ففكروا معي بالاتي:

مهر البنت حقها وتعيش مكرمة معززة مستورة مش ناقصها اشي ايضا حقها وحق أهلها اللي ربوها ووصلوها الك، بس مش حق أي حدا انه تتبهدل انت بالمصاريف اللي ما الها داعي وانك تقعد تحوش ٥ سنين عالاقل عشان تحطهن مصاريف ساعتين صالة ومعازيم وتخبيص ما اله داعي ايضا، حقك انك لما تستطيع الباءة تتزوج، وأنا لست عالم بالدين ولكن اعتقد انه الباءة مش يعني صالة و زينة وعشاء والخ، بل الباءة انك تكون قد مسؤوليات الحياة الزوجية من حب واهتمام وحماية ومصاريف وتوجيه وعقل.

- ليش ما يكون العرس بشاليه او مزرعة ايجارها ٢٠٠ دينار باليوم ( وما اكثرهن وأجملن) ؟ بدل صالة ب ٢٥٠٠ عالاقل!!!

- ليش ما يكون المدعويين هما الاقارب والاصدقاء المقربين فقط بعدد ٥٠ او ٦٠ شخص بدل ٣٥٠ شخص، ويقصوا الكيكة العرسان وتتوزع على المدعويين ويشاركوا فرحتهم؟

- ليش wedding planner ابصر شو قصته ب ١٥٠٠ دينار؟ عادي استأجر كراسي وطاولات على عدد المدعويين ويكونوا جميلات.

- ليش حفلة الخطبة بصالة ايضا ب ٢٠٠٠ دينار؟ هاي شو فايدتها نفسي افهم.

- ليش كروت وورد وزينة واضاءة وسيارات و كوشة و فساتين لخواتها وفساتين لخواتك وصالونات لخواتها ولخواتك و قصص الها اول ما الها اخر!!!!

طيب ليش ما يكون احلى عرس تكلفته ٣ آلاف دينار بدل ١٠ آلاف، والفرقية الك اذا كان معك اصلا سافر فيه اشتري سيارة زبط دارك اتبرع فيه سوي اللي بدك ياه لأنه والله ساعتين ما رح ترجع تتفرج عالفيديو تبعهم حتى! 

وليش ما يكون للشب شروط زي ما هو للبنت، مثلا عمي العرس حيكون بمزرعة وهيك هيك، بدك اهلا وسهلا ما بدك مع السلامة من اولها.

على فكرة انا متزوج وعملت بصالة متوسطة والعرس التقليدي اللي انا بحكي عنه فوق، وانا عرفت وتأكدت انه غلط خاصة لما صاحبي حكالي بس خطب عرسي بعد سنة ليش عشان اجمع حق العرس!!

أنا عارف انه ما حدا قادر يعملها خوفا من حكي الناس ولأنه زي ما حكيت ٩٠% اصبح واقع مجبورين عليه، ولكن مشروع " زواج بالمنطق" لو اتطبق من جروب زي جروبنا رح يأثر بالمجتمع ورح يغير باعتقادي هاي العادات السيئة جدا، وأي شب بفكر يطبقه من جروبنا ليش ما ندعمه احنا ، لو ٥٠٠٠ بس منا حط كل واحد دينار واحد رح يجوزوه ويعتبره نقوط.

ويا ريت اي شب تزوج بزواج منطقي يكتب ويخبرنا كيف كان وكم كلف، يمكن غيره يستفيد من تجربته.